Programa Educación Responsable.

No presente curso o CEIP Plurilingüe A Fraga foi seleccionado, xunto con outros 8 centros de Galicia, para levar a cabo a implantación dun programa de Educación Responsable. Este ano implántase por primeira vez de maneira experimental na nosa comunidade, grazas á colaboración interinstitucional da Fundación Botín, da Fundación Barrié e da Consellería de Cultura, Educación e Ordenación Universitaria.

O proxecto céntrase en favorecer o crecemento físico, emocional, intelectual e social das persoas, promovendo a comunicación e a mellora da convivencia nos centros escolares, e en fomentar a creatividade a partir do traballo con docentes, alumnos e familias.

Actualmente, somos 160 centros de toda España, e a avaliación realizada noutras comunidades autónomas que xa empezaron en anos anteriores, manifestan que houbo unha mellora das habilidades emocionais nos nenos, do clima da aula e dos resultados académicos.

Desde o noso centro queremos dar a coñecer algunhas das actividades que estamos a realizar e tamén poder informar doutras que desde a casa podedes realizar as familias. Por este motivo, neste pequeno recuncho iremos colgando as nosas pequenas experiencias para realizar de forma conxunta.

Esperamos que sexan un momento de diversión e aprendizaxe para compartir.

Un saúdo.


.